Bon Bon er snögghærð griffontík, en það afbrigði er oftast kallað petit brabançon. Hún kom frá Svíþjóð, frá Siv og Christer Jernhake sem eru með Vendettas-ræktun, www.vendettas.se. Hún er hvers manns hugljúfi og mikill fjörkálfur sem virðist alltaf vera í góðu skapi. Hún nýtur allrar athygli sem hún fær til hins ítrasta og afþakkar aldrei klapp eða knús, né heldur aukabita, sé hann í boði. . .

Bon Bon er friðarsinni, henni semur vel við öll önnur dýr á heimilinu og er einstaklega félagslynd. Best finnst henni að fá að sofa uppi í rúmi og á kvöldin stingur hún sér iðulega undir sæng hjá Sóleyju.

Hún er stolt og sýnir sig vel á hundasýningum, enda varð hún íslenskur meistari aðeins 17 mánaða gömul og fékk þá fyrsta alþjóðlega meistarastigið sitt.

Bon Bon var fyrsti griffon-hundurinn sem ég eignaðist og var raunar fyrsti griffon-hundurinn á Íslandi.

Forfeður hennar eru mjög fallegir og heilbrigðir hundar sem hafa langflestir verið afar sigursælir á sýningum í sínum heimalöndum, auk þess að vera heilbrigðir, geðprúðir og langlífir. Í ættum hennar eru bæði petit brabançon (snögghærðir)- og griffon bruxellois- hundar(stríhærðir).

Bon Bon er dugleg í útivist og hefur gaman af því að hlaupa frjáls með hinum hundunum utan þéttbýlisins. . . nema í slagviðri, því út í rok og rigningu fer hún helst ekki ótilneydd!